ពុទ្ធដិមាករ «ព្រះអង្គដងកើ» ដែលជាទីសក្ការដ៏ស័កសិទ្ធ ត្រូវបានបុរសម្នាក់យកញញូរវាយបណ្ដាលឱ្យប្រះស្រាំព្រះហត្ថខាងស្តាំ

161

ភ្នំពេញ៖ សមត្ថកិច្ចបានធ្វើការឃាត់ខ្លួនបុរសម្នាក់ បន្ទាប់ពីបានធ្វើសកម្មភាពយកញញួរវាយពុទ្ធដិមាករព្រះអង្គដងកើ បណ្តាលឱ្យបែកបាក់ កាលពីវេលាម៉ោង០២:៣០នាទីរសៀល ថ្ងៃទី២៥ ខែវិច្ឆិកា ឆ្នាំ២០២០ ផ្លូវព្រះស៊ីសុវត្តិ ភូមិ១ សង្កាត់ជយ័ជំនះ ខណ្ឌដូនពេញ រាជធានីភ្នំពេញ ។

តាមការបញ្ជាក់ពីសមត្ថកិច្ចឱ្យដឹងថា ករណីនេះបង្កឡើងដោយជនសង្សយ័ឈ្មោះ ឡោ គឹមសួ ភេទប្រុស អាយុ២៧ឆ្នាំ ។ មុនពេលកើតហេតុ ជនសង្ស័យខាងលើបានដើរមកព្រះអង្គដងកើឈរខាងក្រៅបង្អួច លើកដៃសំពះ បន្ទាប់មកបានចូលតាមបង្អួចខាងត្បូង ដៃកាន់ញញួរដងឈើ ធ្វើសកម្ម​ភាពវាយទៅលើរូបសំណាកព្រះអង្គដងកើ បណ្តាលឱ្យប្រះស្រាំ ព្រះហត្ថខាងស្តាំ ខូចខាត ។

សមត្ថកិច្ចបន្តទៀតថា ពេលនោះឈ្មោះ ហាស់ សឿន ភេទប្រុស ជាអ្នកបំរីការងារ ក្នុងព្រះអង្គដងកើឃើញ បានស្រែកឆោឡោឡើង ស្របពេលដែលកម្លាំងសមត្ថកិច្ចប៉ុស្តិ៍ជយ័ជំនះ ដែលប្រចាំការគោល​ដៅកន្លែងកើតហេតុ បានមកជួយអន្តរាគមន៍ភ្លាមៗ និងឈានដល់ឃាត់ខ្លួនជនសង្ស័យ ព្រមទាំងដកហូតវត្ថុតាង ញញួរដងឈើ០១ ជាឧបករណ៍ធ្វើសកម្មភាព នាំយកមកប៉ុស្តិ៍នគរបាលជ័យជំនះ ដើម្បីដំណើរការជំនាញនឹងអនុវត្តន៏តាមនិតិវិធី ។

គួរបញ្ជាក់ដែរថា ជា​រៀងរាល់ថ្ងៃ មិន​ថា​វេលា​ព្រឹក ឬក៏​ល្ងាច​នោះទេ ​ជាពិសេស​ថ្ងៃឧបោសថសីល និងបុណ្យ​ប្រពៃណីជាតិ​ផ្សេងៗ ​គេ​តែង​តែសង្កេតឃើញ​មនុស្សម្នា​ក្មេង​ចាស់ ​ប្រុស​ស្រី ​យ៉ាងច្រើន​កុះករ​ បាននាំគ្នា​ទិញ​គ្រឿង​សក្ការៈ និងតង្វាយ​រួមមាន ធូប ទៀន ស្លាធម៌​ដូងខ្ចី ចេកទុំ ផ្កាឈូក​ក្រ​ហម ស ថ្វាយ​ដល់​បារមី​ព្រះអង្គ​ដង​កើ ដើម្បី​សុំ​សេចក្តីសុខ សេចក្ដី​ចម្រើន ​ត្រជាក់ត្រជុំ​ទៅតាម​ជំនឿ​រៀងៗ​ខ្លួន ។ លើសពីនេះ ក៏មានការថ្វាយបទភ្លេងពិណពាទ្យ លែងសត្វ ដូចជា អណ្តើក បក្សី ឬ ត្រី នៅខាងមុខព្រះអង្គដងកើ ដើម្បីចៀសផុតពីគ្រោះចង្រៃផ្សេងៗផងដែរ ៕