តុលាការសម្រេចផ្តន្ទាទោស ស្ត្រីដែលយកកាំបិតឆូតមុខ អារដៃក្មេងស្រីអាយុ៥ឆ្នាំដេរជាង១០០ថ្នេរ ដាក់ពន្ធនាគារ១២ឆ្នាំ និងពិន័យជាប្រាក់២០០លានរៀល
ភ្នំពេញ៖ លោកស្រី អ៊ុក រ៉េតគន្ធា ប្រធានក្រុមប្រឹក្សាជំនុំជម្រះសាលាដំបូងរាជធានីភ្នំពេញ នៅថ្ងៃទី២៥ ខែវិច្ឆិកា ឆ្នាំ២០២០នេះ បានប្រកាសសាលក្រមសម្រេចផ្តន្ទាទោសស្ត្រីម្នាក់ឈ្មោះ លីវ ប៊ុនធឿន អាយុ៤៣ឆ្នាំ ដាក់ពន្ធនាគារ១២ឆ្នាំ និងពិន័យជាប្រាក់ចំនួន២០០លានរៀល ដោយប្រព្រឹត្តិបទល្មើស យកកាំបិតឆូត.មុខ និងអារ.ដៃ ក្មេងស្រីអាយុ៥ឆ្នាំ រងរបួសធ្ងន់ធ្ងរ ដេរជាង១០០ថ្នេរ ។
គួររំលឹកថា នៅរសៀលថ្ងៃកើតហេតុ ពោលគឺថ្ងៃទី១៦ ខែកក្កដា ឆ្នាំ២០២០ ស្រ្តីដែលជាជនសង្ស័យខាងលើ បានទៅទិញកូនកាំបិតនៅក្នុងផ្សារ រួចចាប់ក្មេងស្រីរងគ្រោះ អារ.មុខ ច្រមុះ និងដៃ ដេរជាង១០០ថ្នេរ ព្រោះខឹងនឹងក្មេងស្រីរងគ្រោះ យកដុំថ្មគប់លើកូនប្រុសរបស់ខ្លួន ។ ក្រោយចាប់ខ្លួន ស្ត្រីរូបនេះសារភាពទៀតថា ខ្លួនខឹងខ្លាំងណាស់ដេកមិនលក់២យប់មកហើយ ដោយសារតែក្មេងស្រីរងគ្រោះ ធ្វើឱ្យកូនខ្លួនចេញឈាម ដូច្នេះខ្លួនសុំត្រឹមតែឱ្យក្មេងស្រីរងគ្រោះរូបនេះ ចេញឈាមវិញដូចជាកូនខ្លួនតែប៉ុណ្ណោះ ។
ហេតុការណ៍នោះបានកើតឡើង នៅចំណុចមុខផ្ទះលេខ៦ ផ្លូវលេខ២៦ បុរីភពថ្មីឈូកវ៉ា២ ក្នុងភូមិតិក្ខប្បញ្ញោ សង្កាត់សំរោងក្រោម ខណ្ឌពោធិ៍សែនជ័យ រាជធានីភ្នំពេញ ។ ជនដៃដល់មានឈ្មោះ លីវ ប៊ុនធឿន រស់នៅកន្លែងកើតហេតុខាងលើ ។ ដោយឡែកក្មេងស្រីរងគ្រោះឈ្មោះ ឡាស់ម៉ាវី លីយ៉ា អាយុ៥ឆ្នាំ រស់នៅផ្ទះលេខ១៨ ផ្លូវលេខ២០ បុរីភពថ្មីឈូកវ៉ា២ ភូមិតិក្ខប្បញ្ញោ សង្កាត់សំរោងក្រោម ខណ្ឌពោធិ៍សែនជ័យនោះដែរ ៕
