អាវុធហត្ថរាជធានីភ្នំពេញ ឃាត់ខ្លួនជនសង្ស័យ២នាក់ បញ្ជូនទៅតុលាការ ពាក់ព័ន្ធករណី ឆក់ទូរស័ព្ទ

58

ភ្នំពេញ៖ជនសង្ស័យពីរនាក់ត្រូវបានកម្លាំងជំនាញមូលដ្ឋានអាវុធហត្ថខណ្ឌទួលគោក ឃាត់ខ្លួនពាក់ព័ន្ធករណីឆក់ទូរស័ព្ទ នៅវេលាម៉ោង ០០:១៦នាទីយប់ ថ្ងៃទី០៨ ខែមករា ឆ្នាំ២០២៣ នៅចំណុចផ្លូវមុន្នីរ៉េត សង្កាត់ផ្សារដើមមគរ ខណ្ឌទួលគោក ។

ក្នុងរបាយការណ៍របស់អាវុធហត្ថកាលពីថ្ងៃទី ៩ ខែមករា ឆ្នាំ ២០២៣ ឱ្តដឹងថាជនសង្ស័យទាំងពីរនាក់នោះមាន ឈ្មោះ ហួង រក្សា ភេទប្រុស អាយុ២៥ឆ្នាំ មុខរបរមិនពិតប្រាកដ ស្នាក់នៅ ផ្ទះលេខ១២១ ផ្លូវលំ ភូមិក្បាលទំនប់ សង្កាត់បឹងទំពុន ខណ្ឌមានជ័យ និង ឈ្មោះ សួន សុភ័ក្រ្ដ ភេទប្រុស អាយុ២២ឆ្នាំ មុខរបរ មិនពិតប្រាកដ ស្នាក់នៅផ្ទះលេខ1A ផ្លូវ៤៩២ សង្កាត់ផ្សារដើមថ្កូវ ខណ្ឌចំការមន រាជធានីភ្នំពេញ។

របាយការណ៍ដដែលបន្តថា សមត្ថកិច្ចបាន ដកហូតវត្ថុតាងមួយចំនួនរួមមាន៖ ១.ម៉ូតូ០១គ្រឿងម៉ាក Honda Beat ពណ៌ស សេរីឆ្នាំ២០២២ ស្លាកលេខ ក្រចេះ1G.9180 , ២.ទូរស័ព្ទដៃចំនួន០៣គ្រឿង, ៣.កាបូបលុយ០១ និង នាឡិកាដៃ០១គ្រឿង។ ចំណែកវត្ថុតាងទូរស័ព្ទដៃ ត្រូវបានសមត្ថកិច្ចអាវុធហត្ថខណ្ឌទួលគោក ធ្វើកំណត់ហេតុប្រគល់ជូនជនរងគ្រោះវិញផងដែរ។

ជនសង្ស័យទាំង០២នាក់ បានសារភាពឲ្យដឹងដូចគ្នាថា ពួកខ្លួន បានធ្វើសកម្មភាពឆក់ទូរស័ព្ទដៃ ពីជនរងគ្រោះ ពិតប្រាកដមែន។

ជនសង្ស័យទាំង០២នាក់ខាងលើ ត្រូវបានកម្លាំងជំនាញការិយាល័យប្រឆាំងបទល្មើសព្រហ្មទណ្ឌ នៃ កងរាជអាវុធហត្ថរាជធានីភ្នំពេញ កសាងសុំណុំរឿងបញ្ជូនទៅតុលាការ ដើម្បីចាត់ការតាមនីតិវិធីច្បាប់៕