រកឃើញពពុះសណ្ដែក១០គីឡូក្រាម មានសារធាតុគីមីបូរ៉ាក់ និងភេសជ្ជៈបាកាសក្លែងក្លាយចំនួន៤កេស នៅផ្សារស្វាយជ្រំ
ស្វាយរៀង៖ នៅព្រឹកថ្ងៃទី២៤ ខែវិច្ឆិកា ឆ្នាំ២០២០មន្ត្រីសាខាការពារអ្នកប្រើប្រាស់ កិច្ចការប្រកួតប្រជែង និង បង្ក្រាបការក្លែងបន្លំសាខាខេត្តស្វាយរៀង (ក ប ប) បានសហការជាមួយមន្ទីពាណិជ្ជកម្មខេត្ត និង អាជ្ញាធរដែនដី បានចុះត្រួតពិនិត្យទំនិញផលិតផលម្ហូបអាហារនិងទំនិញវ៉ិចខ្ចប់ស្រាប់ នៅតាមបណ្ដាស្តង់ដាក់តាំងលក់ក្នុងផ្សារស្វាយជ្រំ ស្រុក ស្វាយជ្រំ ខេត្តស្វាយរៀង ។
លោក ផឹង និល ប្រធានសាខា(ក ប ប)ខេត្តស្វាយរៀងបានឲ្យដឹងថាសកម្មភាពការងារ ត្រួតពិនិត្យរបស់មន្ត្រីជំនាញបានពិនិត្យគ្រឿងឧបភោគ បរិភោគនៅតាម ស្តង់ក្នុងផ្សារតាំងលក់ទំនិញមួយចំនួន និងបានប្រើប្រាស់ឧបករណធ្វើ Test Kits បឋមលើម្ហូបអារហា ចំនួន ២៦ គំរូ ដើម្បីស្វែងរកសារធាតុគីមីហាមឃាត់ដែលធ្វើអោយប៉ះពាល់ដល់សុខភាពប្រជាពលរដ្ឋ ។
លោកបានបញ្ជាក់ថា ជាលទ្ធផលក្រោយការចុះអនុវត្តការងារ មន្ត្រីជំនាញយើងបានរកឃើញទំនិញមានសារធាតុគីមី និងទំនិញខូចគុណភាពហួសកាលបរិច្ឆេទប្រើប្រាស់ដូចជា ពពុះសណ្តែក ចំនួន ១០ Kg មានសារធាតុ ( Borax )ទឹកភេសជ្ជៈ បាកាស ចំនួន ៤ កេះ ( ក្លែងក្លាយ និង ហួសកាលបរិច្ឆេទប្រើប្រាស់ )ទឹកក្រូចដបចំណុះ១,៥លីត្រ៦យួរ ស្មើ៣៦ ដបនិងនំធុង ចំនួន ២ធុង ទឹកត្រចៀកកាំ ចំនួន ២ កេះ ទឹកដោះគោឆៅ ម៉ាក អេរ៉ាហ្គោល ចំនួន ១៦ យួរក្នុងនោះមន្ត្រីជំនាញយើងបានធ្វើកំណត់ហេតុដកហូតទំនិញទាំងនោះយកមករក្សាទុកដើម្បីធ្វើការដុតកម្ទេចចោលនៅពេលក្រោយ ។
លោកបានបញ្ជាក់ថា មុខទំនិញដែលខូចគុណភាព ហួសកាលបរិច្ឆេទប្រើប្រាស់និងមានសារធាតុគីមីនោះ បើយកទៅបរិភោគអាចនឹងធ្វើឱ្យរាគរួស ក្អួតចង្អោរ ខូចក្រលៀន ក្រពះ និងឧស្សាហ៍ វិលមុខ បណ្ដាលឲ្យចុះអន់ថយនូវកម្លាំង និងបង្កឲ្យសុខភាពចុះខ្សោយអាចនឹងមានបញ្ហាដល់អាយុជីវិតទៀតផង ។
លោក ផឹង និល បានផ្សព្វផ្សាយនិងអំពាវនាវដល់បងប្អូនអាជីវករ ប្រជាពលរដ្ឋមុននឹងទិញរបស់អ្វីមួយទៅបរិភោគនិងលក់លើទីផ្សារសូមពិនិត្យទៅលើកាលបរិច្ឆេទ ប្រើប្រាស់ឲ្យបានច្បាស់លាស់ដើម្បីធានាបានសុខុមាលភាពល្អទាំងអ្នកលក់និងអ្នកទិញផងដែរ ៕ ដោយៈPK
