វាយខ្នោះបរុស ២នាក់ សង្ស័យមានផ្ទុកសារធាតុញៀន ជិះម៉ូតូBeat ឆ្លងកាត់គោលដៅ ត្រូវបានសមត្ថកិច្ចឆែកឆេររកឃើញមានគ្រឿងញៀន ១៥កញ្ចប់ធំតូច
ភ្នំពេញ៖ កាលវេលាម៉ោង ០៩ ០៥នាទីយប់ ថ្ងៃទី១២ ខែមករា ឆ្នាំ២០២១នេះ នៅចំណុចមុខសាលាមត្តេយ្យភូមិ១ ផ្លូវជាតិលេខ២ ស្ថិតក្នុងភូមិព្រែកតាគង់ សង្កាត់ចាក់អង្រែលើ ខណ្ឌមានជ័យ ត្រូវបាននគរបាលខណ្ឌមានជ័យ បានវាយខ្នោះឃាត់ខ្លួនបុរស២នាក់ ដែលជិះម៉ូតូBeat ឆ្លងកាត់គោលដៅ ឆែកឆេររកឃើញមានគ្រឿងញៀន ១៥កញ្ចប់។
កម្លាំងអធិការដ្ឋាននគរបាលខណ្ឌមានជ័យ ដឹកនាំដោយលោកវរសេនីយ៍ឯក ម៉េង វិមានតារា អធិការនគរបាលខណ្ឌមានជ័យ បន្តដាក់គោលដៅត្រួតពិនិត្យរឹតបន្តឹងច្បាប់ចរាចរណ៍ផ្លូវគោកថ្មី ដោយធ្វើការឃាត់ម៉ូតូជាច្រើនគ្រឿង ដើម្បីធ្វើការបង់ផាកពិន័យ ព្រោះម្ចាស់ម៉ូតូមិនពាក់មួកការពារសុវត្ថិភាព និងឃាត់អ្នកបើកបរក្រោមឥទ្ធិពលគ្រឿងស្រវឹងជាច្រើននាក់។ ជាមួយគ្នានេះសមត្ថកិច្ចសង្ស័យបុរស២នាក់ ដែលជិះម៉ូតូBeat មានលាក់ទុកគ្រឿងញៀន ក៏ឃាត់ខ្លួនភ្លាមៗរកឃើញគ្រឿងញៀនចំនួន១៥កញ្ចប់ធំតូច ត្រូវបានសមត្ថកិច្ចចាប់វាយខ្នោះឃាត់ខ្លួនបញ្ជូនទៅស្នាក់ការប៉ុស្តិ៍ដើម្បីសាកសួរ ចាត់វិធានការតាមផ្លូវច្បាប់។
សូមបញ្ជាក់ផងដែរថា ជនសង្ស័យម្នាក់ជនជាតិវៀតណាម ឈ្មោះ ស៉ុង ងារ និងជនសង្ស័យម្នាក់ទៀតជាជនជាតិខ្មែរឈ្មោះ បូ គន្ធា ភេទប្រុស អាយុ ៣៨ឆ្នាំ ស្នាក់នៅផ្ទះជួលច្រកឡឥដ្ឋ ក្នុងសង្កាត់ចាក់អង្រែលើ ខណ្ឌមានជ័យ រាជធានីភ្នំពេញ មុខរបរជាងធ្វើកុងម៉ា ៕ ដោយ៖ KC905